Ramazon va tibbiy yondashuv: kimlar ehtiyot boʻlishi kerak?
Jahon sogʻliqni saqlash tashkiloti Ramazon roʻzasini tutishda sogʻliq bilan bogʻliq ayrim masalalarga ham eʼtibor qaratishni tavsiya qiladi. Unga koʻra, qandli diabet bilan ogʻriganlar, homilador ayollar va surunkali xastaligi bor shaxslar roʻza tutish masalasida shifokor bilan maslahatlashishi zarur.
Jamoat namozlari va shu kabi yigʻinlardagi yaqin muloqot nafas yoʻllari infeksiyalarining tarqalish xavfini oshirishi mumkin. Bunday vaziyatlarda oddiy sanitariya qoidalariga amal qilish orqali sogʻliqni asrash mumkin.
Qandli diabet Sharqiy Oʻrtayer dengizi mintaqasida eng keng tarqalgan kasalliklardan biri hisoblanadi. Masalan, Misrda 9 milliondan ortiq kishi diabet bilan yashaydi va nosogʻlom turmush tarzi sabab bu koʻrsatkich oʻsmoqda.
Mutaxassislar diabetga chalinganlarga Ramazonda shifokor bilan maslahatlashib, xavfsiz roʻza rejasini tuzishni tavsiya etadi. Qondagi qand miqdorini muntazam oʻlchash, iftorlik vaqtida sogʻlom ovqatlanish, shakar va yogʻni cheklash, yetarlicha suv ichish hamda yengil jismoniy mashqlar bilan cheklanish kerak boʻladi.
Bu yil Ramazon gripp mavsumiga toʻgʻri kelmoqda. Shu bois yoʻtal va aksirishda ogʻizni tirsak bilan yopish, qoʻllarni tez-tez yuvish, betob holatda ommaviy joylarga bormaslik va shifokor tavsiya qilgan dori-darmonlarni qabul qilish zarur.
Qariyalar, homilador ayollar va immuniteti past shaxslar yuqori xavf guruhiga kiradi. Emlanish, shaxsiy gigiyena va tibbiy maslahatlarga amal qilish Ramazonni xavfsiz oʻtkazishga yordam beradi. Qish mavsumida suv isteʼmolini nazorat qilish va yetarlicha suyuqlik qabul qilish ham muhimdir.
Homilador va emizikli ayollar roʻza tutish masalasini shifokor bilan maslahatlashgan holda hal etishi lozim. Sogʻlom ayollar odatda roʻzani asoratsiz tutishi mumkin, biroq ovqatlanish muvozanatli boʻlishi shart.
Iftor va saharlikda uglevodlar, oqsil, vitamin va minerallarga boy mahsulotlar isteʼmol qilish, koʻproq meva-sabzavot yeyish, suvsizlanishning oldini olish talab etiladi. Homila harakatining kamayishi, kuchli qayt qilish yoki hushdan ketish kabi holatlarda zudlik bilan shifokorga murojaat qilish kerak.
Sogʻlom ovqatlanish qoidalari
Mutaxassislar ogʻizni xurmo bilan ochishni tavsiya qiladi — u tolaga boy manba hisoblanadi. Kuniga kamida 10 stakan suv ichish, shoʻrva, tarvuz va koʻkatli salatlar kabi suyuqlikka boy taomlarni tanlash foydali.
Qovurilgan va qayta ishlangan yogʻli mahsulotlardan saqlanish, toʻliq donli mahsulotlar va pishirilgan yoki grilda tayyorlangan goʻshtni afzal koʻrish kerak. Ovqatni shoshilmasdan isteʼmol qilish ortiqcha yeyishning oldini oladi. Saharlik yengil, ammo toʻyimli boʻlishi ayniqsa qariyalar, oʻsmirlar va homiladorlar uchun muhim.
Bu oy chekishni tashlash uchun qulay fursat hisoblanadi. Dunyoda 1,3 milliard tamaki isteʼmolchilarining 80 foizdan ortigʻi past va oʻrta daromadli mamlakatlarda yashaydi. Mutaxassislar bu oyda tamaki va nikotin mahsulotlaridan butunlay voz kechishga chaqirmoqda.
Chekishni tashlagan shaxsda 5-yil ichida insult xavfi chekishmaydigan odam darajasiga tushadi. Shu bois, Ramazon sogʻlom hayotga qadam qoʻyish imkoniyati degani.
Ramazon — jamiyatda hamjihatlikni mustahkamlash oyi. Xayriya ishlarida koʻngilli sifatida ishtirok etish, yaqinlar bilan samimiy muloqot qilish va ehtiyojmandlarga yordam berish ruhiy barqarorlikni oshiradi. Shu bilan birga, oʻz salomatligingizga ham eʼtibor bering. Stressni kamaytirish, zararli odatlarni qisqartirish va aniq maqsad qoʻyib, ularga bosqichma-bosqich erishish sogʻlom turmush tarzini shakllantiradi.
- 23 Fevral, 16:22
-
Batafsil
