Буюк Британиядаги Англиянинг Раскин университети (АРУ) ва Мексикадаги de las Americas университети олимлари болалар учун нонуштани ўтказиб юборишнинг зарарини аниқлашди.

BMC Nutrition Journal журналида чоп этилган тадқиқот натижаларига кўра, бу руҳий муаммолар ва катталар ҳаётида қийинчиликларга олиб келиши мумкин.

Тадқиқотда 42 мамлакатдан 10 ёшдан 17 ёшгача бўлган 150 000 дан ортиқ болалар ва ўсмирлар иштирок этди. Нонушта қилиш доимийлиги ҳаётдан қониқиш даражаси билан боғлиқлиги аниқланди: ҳар куни нонушта қиладиган болаларда қониқиш даражаси энг юқори, ҳеч қачон нонушта қилмайдиган болаларда эса энг паст.

Турли мамлакатларда ҳаётдан қониқиш даражаси турлича бўлган. Масалан, Португалияда ҳар куни нонушта қилган болалар ҳаётдан қониқиш даражасининг энг юқори кўрсаткичга эга бўлишган, Руминияда эса ҳеч қачон нонушта қилмаган болалар энг паст кўрсаткичга эга бўлишган. 

Бундан ташқари, ҳар куни нонушта қиладиган одамлар орасида ҳам мамлакатлар ўртасида фарқлар борлиги маълум бўлди. Шундай қилиб, мунтазам равишда нонушта қиладиган Англиядаги болалар Руминия, Венгрия, Германия ва Австрияга ютқазиб, барча мамлакатлар орасида ҳаётдан қониқиш даражасининг энг паст кўрсаткичини намойиш этдилар.

Олимларнинг таъкидлашича, мунтазам нонушта қилиш нафақат организмни зарур энергия ва озиқ моддалар билан таъминлайди, балки когнитив функцияларни, шу жумладан, диққатни жамлаш ва ўрганиш қобилиятини яхшилашга ёрдам беради.