Янгиликлар

not found

Хориждан қайтганларни мажбурий ОИВ текширувидан ўтказиш кўзда тутилган қонун лойиҳаси Сенатга юборилди

Қонунчилик палатаси томонидан 90 кундан ортиқ чет элда бўлиб қайтган фуқароларни ОИВ (инсон иммунитет танқислиги вируси) инфекциясига мажбурий тиббий кўрикдан ўтказишни назарда тутувчи қонун лойиҳаси учинчи ўқишда қабул қилинди. Қонун лойиҳаси билан «Одамнинг иммунитет танқислиги вируси келтириб чиқарадиган касаллик (ОИВ инфекцияси) тарқалишига қарши курашиш тўғрисида»ги, «Аҳолининг санитария-эпидемиологик осойишталиги тўғрисида»ги, «Хусусий бандлик агентликлари тўғрисида»ги ҳамда «Аҳоли бандлиги тўғрисида»ги қонунларга бир қатор ўзгартириш ва қўшимчалар киритиш таклиф қилинмоқда. Қонун лойиҳасига кўра, 18 ёшдан 60 ёшгача бўлган ва чет элда узлуксиз 90 кун ва ундан ортиқ муддат бўлиб қайтган Ўзбекистон фуқаролари, Ўзбекистон ҳудудида доимий яшайдиган чет эл фуқаролари ҳамда фуқаролиги бўлмаган шахслар ОИВ инфекциясига мажбурий тиббий текширувдан ўтказилади. Шунингдек, меҳнат фаолиятини амалга ошириш учун Ўзбекистонга келаётган хорижий фуқаролар ва фуқаролиги бўлмаган шахслар ҳам ушбу текширувдан ўтишга мажбур бўлади. Маҳаллий фуқаролар давлат бюджети ҳисобидан, хорижликлар эса ўз маблағи, иш берувчиси ёки қонун билан тақиқланмаган бошқа манбалар ҳисобидан кўрикдан ўтказилади. Ташаббускорлар фикрича, ОИВ вируси организмда одатда 90 кун ичида аниқланадиган даражага етади. Шу боис ушбу муддат асос қилиб олинган. Маълумотларга кўра, 2024 йилда чет элдан қайтган 1,7 миллион фуқародан 434 минг нафари ихтиёрий тарзда тиббий текширувдан ўтган ва улардан 1512 нафари ОИВ инфекцияси билан касаллангани аниқланган. Қонун лойиҳаси, шунингдек, хусусий бандлик агентликлари зиммасига фуқароларни чет элга юборишдан олдин борадиган давлат қонунчилиги ва яшаш қоидалари бўйича ўқитиш мажбуриятини ҳам юклайди. Депутатларнинг таъкидлашича, ушбу қонун лойиҳаси ОИВ инфекцияси тарқалишини олдини олиш, аҳоли саломатлигини муҳофаза қилиш ва меҳнат миграцияси жараёнларида ижтимоий хавфсизликни таъминлашга хизмат қилади. Қонун лойиҳаси депутатлар томонидан учинчи ўқишда ҳам қабул қилинди ва Сенатга юборилди. 

  • 8 Июль, 15:00
  • Батафсил
not found

Ўзбекистоннинг Осиё фармацевтика бозоридаги ўрни

Statista’нинг маълумотларига кўра, 2025 йилда Осиёда фармацевтика бозори  248,8 миллиард АҚШ долларга етиши кутилмоқда. Саноат ўсишига таъсир қилувчи асосий омиллар қаторида аҳолининг қариши натижасида сурункали касалликларни даволашга бўлган эҳтиёжнинг ортиши, шунингдек, ўрта тоифа аҳолининг кўпайиши ва даромад даражасининг ўсиши қайд этилган. Бу эса дори-дармонлар ҳамда соғлиқни сақлаш маҳсулотларига бўлган харажатларни оширишга туртки бермоқда. Марказий Осиё, жумладан Ўзбекистон, минтақавий фармацевтика бозори тузилмасида муҳим ўринни эгаллайди. Республика халқаро ишлаб чиқарувчилар томонидан барқарор қизиқишга сабаб бўлмоқда, дейилади Proxima Research'нинг Ўзбекистоннинг Осиё фармацевтика бозоридаги ўрнига бағишланган таҳлилий мақоласида.   Ўзбекистон бозоридаги истеъмол тенденциялари ва бозорнинг тузилмаси 2025 йилнинг 1-чораги якунига кўра, Ўзбекистон чакана фармацевтика бозори ҳажми пул билан ифода этилганда 520 миллион АҚШ долларини ташкил этди. Миқдор жиҳатидан эса дори-дармонлар ва биологик фаол қўшимчалар (БАД) савдоси 1-чоракда 151 миллион пакетга баҳоланди. Қўшни Қозоғистон Республикаси билан солиштирганда, ушбу кўрсаткичлар долларда 26%, пакетларда эса 11,9% га юқори бўлди. Бунга  Ўзбекистон ҳудуди кичикроқ бўлса-да, аҳолининг кўплиги сабаб бўлиши мумкин-дейилади мақолада. Ўзбекистонда дори-дармонлар ва биологик фаол қўшимчалар савдосининг пул билан ифода этилган ҳажми ўтган йилнинг мос даврига нисбатан 3,8% га ошган, аммо миқдорий кўрсаткичлар бўйича 11,5% пасайиш кузатилган. Истеъмолнинг асосий қисми дори-дармонларга тўғри келади – пул ва миқдор жиҳатдан 90% дан ортиқ, биологик фаол қўшимчалар эса мос равишда 10% дан камроқ улушга эга. 2023–2024 йилларда Ўзбекистон фармацевтика бозори пул билан ифода этилганда фаол ўсишни кўрсатган, бироқ ўрганилаётган даврда секинлашув кузатилмоқда. Шу билан бирга, истеъмолни қисқаришнинг барқарор тенденцияси қайд этилган. Ўзбекистон дорихоналарида дори воситалари савдосининг асосий қисми рецепт асосида бериладиган препаратларга тўғри келади. Шу билан бирга, Ўзбекистон фармацевтика бозори импортга (Қозоғистонда бўлгани каби)  юқори даражада боғлиқ. 2025 йил 1-чорагида импорт дори воситаларининг улуши пул ифодасида 89%, миқдор жиҳатидан эса 65% ни ташкил этди. Шу тариқа, миқдорий жиҳатдан маҳаллий ишлаб чиқарилган дорилар умумий савдонинг учдан бир қисмини ташкил қилган бўлса-да, пул ифодасида бу кўрсаткич бор-йўғи 11% ни ташкил қилмоқда. Ўзбекистонда фаолият юритувчи маркетинг компаниялари орасида дори воситалари савдоси ҳажми бўйича халқаро компаниялар етакчилик қилмоқда. Жумладан, KRKA, Юрия-Фарм ва STADA биринчи учликни шакллантирган. Бу эса мамлакат бозорининг импортга нисбатан очиқлигини ва халқаро ишлаб чиқарувчиларга юқори талаб мавжудлигини кўрсатади. Таҳлил қилинаётган даврда АТС (анатомо-терапевтик-кемёвий) классификацияси бўйича асосий улушни ҳазм тизими ва метаболизмга таъсир этувчи воситалар, қон тизими ва гемопоэзга таъсир этувчи воситалар, шунингдек, микробларга қарши воситалар эгаллади. Биринчи ўнталикда савдо ҳажми бўйича энг катта ўсишни дерматологик воситалар, шунингдек, юрак-қон томир тизимига таъсир қилувчи дори воситалари номоён этди.  маҳсулотлар кўрсатди. Препаратлар брендлари орасида Тивротин савдо ҳажми бўйича рейтингнинг биринчи поғонасини эгаллади. ТОП-3 рўйхатни шунингдек Реосорбилакт ва L-лизина эсцинат тўлдирди. Ўзбекистонда биологик фаол қўшимчалар (БАД) сотуви ҳажми бўйича етакчи маркетинг ташкилотлар рейтингида биринчи ўринни Synergy Pharmco эгаллади. Ундан кейинги ўринларда Asia Pharm Group ва Bayer Consumer Care жой олган. Ўзбекистон пойтахти  — Тошкент дори воситалари ва БАД савдоси бўйича умумий товар айланмасининг 32% ни таъминлаб, бозордаги энг катта улушга эга. Шу билан бирга, 2025 йил 1-чорагида ҳудудлар ҳам аҳамиятли ҳисобланади. Улар абсолют кўрсаткичлар бўйича Тошкентдан ортда қолса-да, дори воситалари ва биологик фаол қўшимчалар савдосининг пул ифодасида юқори ўсиш суръатини намоён этмоқда. Ўзбекистон фармацевтика бозорининг муҳим ривожланиш тенденцияларидан бири — дорихона бизнесининг бирлашувидир. 2022–2024 йиллар давомида дорихона тармоқлари улуши барқарор ўсиб борган. 2025 йил 1-чораги якунларига кўра, тармоқли дорихоналарнинг бозордаги улуши 40,6% ни ташкил этмоқда.

  • 8 Июль, 09:10
  • Батафсил
not found

Қайси ўсимлик экземани даволаши аниқ бўлди

Немис олимлари ўтказган тадқиқотга кўра, имбир ва каннабидиол экстракти бор янги кремлар атопик дерматит белгиларини самарали камайтиради. Bionorica SE ( Германия) мутахассислари томонидан ўтказилган 12 ҳафталик тадқиқотда 94 нафар катталар ва болалар иштирок этди.Улар кунига икки марта BNO 3732 танани парваришлаш лосьонини ҳамда заруратда интенсив парвариш учун BNO 3731 воситасини ишлатдилар. Иккала маҳсулотда ҳам занчабил ва каннабидиол экстрактлари мавжуд эди. Муолажа натижалари қичишиш даражаси, ҳаёт сифати, симптомлар кучайиши ва тери ҳимоя қатламининг ҳолатига қараб баҳоланди. Биринчи 4 ҳафта ичида синов воситаларини қўллаш натижасида RECAP шкаласи бўйича ўртача кўрсаткичлар 54% га камайди, қичишиш 53% га пасайди. Бу таъсирлар тадқиқот тугагандан сўнг 12 ҳафта давомида сақланиб қолди. Атопик дерматит симптомлари vIGA-AD шкаласи бўйича 63% га камайди, шунингдек, иштирокчиларнинг 59% и касаллик белгилари тўлиқ йўқолганини қайд этди. Катталар ва болаларнинг ҳаёт сифати муолажанинг биринчи 4 ҳафтаси ичида сезиларли даражада яхшиланди ва кейинчалик янада яхшиланишда давом эттирди. Тери барьери таҳлили церамидлар, эркин ёғ кислоталари ва холестерин даражасининг ошганини кўрсатди, шунингдек, узун занжирли ёғ кислоталари ва тўлиқ ривожланган корнеоцитлар нисбатининг сезиларли ошиши кузатилди. Бу эса терининг ҳимоя қатламининг тикланганини англатади. Муаллифларнинг таъкидлашича, бу фаол моддалар нафақат терини намлайди, балки яллиғланишга қарши ва антиоксидант хусусиятларга эга бўлиб, қичишишдан узоқ муддатли ёрдам беради ва тери ҳимоя тўсиғини барқарорлаштиради.

  • 7 Июль, 13:46
  • Батафсил
Нажмите на кнопку ниже, чтобы прослушать текст Powered by GSpeech