SSV huzurida Xaridlar markazi tashkil etilib, dorilar 15 oylik talab asosida xarid qilinadi
Sog‘liqni saqlash vazirligi huzurida Xaridlar markazi va uning 13 ta hududiy filiali tashkil qilinadi. Bu haqda 14-noyabr kuni prezidentga kasalliklarni erta aniqlash va samarali davolash bo‘yicha takliflar taqdimotida so‘z bordi.
Qayd etilishicha, tibbiyot muassasalariga markazlashgan holda dorilar xarid qilishda kamchiliklar bor. Ba’zi shifoxonalarda talabga nisbatan kam olingan bo‘lsa, ba’zilarida dorilar ortib qolgan.
Sog‘liqni saqlash vaziri vazifasini bajaruvchi Asilbek Xudayarov «O‘zbekiston 24» telekanaliga bergan intervyusida 2024 yilgi davlat byudjetidan dori vositalari va tibbiyot buyumlari xarid qilish uchun 1,3 trln so‘m sarflanganini ma’lum qildi.
Uning so‘zlariga ko‘ra, tibbiy texnika davlat tashkilotlari va O‘zmedimpeks kompaniyasini (Sog‘liqni saqlash vazirligi huzurida tibbiy asbob-uskunalarni xarid qilishga javobgar) o‘zaro birlashtirish orqali Xaridlar markazini va uning 13 ta hududiy filiali tashkil etiladi.
Markazga 2025-yil 1-yanvardan boshlab original dori vositalari va yopiq turdagi laborator uskunalar uchun sarflov vositalarini bevosita ishlab chiqaruvchidan to‘g‘ridan to‘g‘ri xarid qilishga ruxsat beriladi.
Xususan, ishlab chiqaruvchisi dunyodagi yagona kompaniya bo‘lgan original dorini to‘g‘ridan to‘g‘ri sotib olishga ruxsat beriladi.
Ushbu toifaga, shuningdek, laboratoriya jihozlari ishlab chiqaruvchining reagentlari uchun mos bo‘lgan yopiq laboratoriyalar, shuningdek, shoshilinch va tez tibbiy yordam uchun dori-darmonlar kiradi.
Bundan tashqari, dori vositalari va tibbiy buyumlarni o‘n besh oylik talab asosida xarid qilish tizimi taklif etilmoqda. Bunda kelgusi yillar uchun ehtiyojlar 1-avgustdan kechikmasdan, davlat byudjeti parametrlari bilan bir vaqtda shakllantiriladi.
Bundan tashqari, ayrim tibbiyot muassasalarida yaroqlilik muddati yaqin qolgan dori vositalari xarid qilingan. Shu munosabat bilan, endilikda yaroqlilik muddati 50 foizga o‘tgan dori vositalarini xarid qilish taqiqlanadi. Ushbu dori vositalarining monitoringi Xaridlar markazi tomonidan amalga oshiriladi.
Xorijdan xarid qilingan dori vositalarini sifatini saqlab qolish maqsadida hududlarga yetkazib berish ham markaz zimmasiga yuklatiladi.
Shuningdek, Bosh prokuratura huzuridagi departament dori vositalari va tibbiyot buyumlarini davlat xaridlari bo‘yicha shaffoflikni ta’minlash ustidan nazoratni o‘rnatadi.
- 19 Noyabr, 14:50
-
Batafsil
