“ Farmatsevtika mahsulotlarining postmarketing nazoratini amalga oshirish tartibi to‘g‘risida”gi Nizomga muvofiq, postmarketing nazorati uchun avvalo dori vositalari yoki tibbiy buyumlar xarid qilinadi.

Postmarketing nazorati uchun xarid qilinadigan namunalar:

- vakolatli organ tomonidan O‘zbekiston Respublikasida davlat ro‘yxatidan o‘tgan va muomalaga chiqarilgan dori vositalari xalqaro patentlanmagan nomi bo‘yicha yoki tibbiy buyumlar savdo nomi bo‘yicha xavfni tahlil qilish asosida — maxsus elektron tizim orqali aniqlanadi.

- shuningdek, dori vositalari yoki tibbiy buyumlarning sifati, xavfsizligi, noqonuniy aylanmasi, nojo‘ya ta’sirlari haqida vakolatli organga kelib tushgan ma’lumotlar hamda murojaatlar asosida — savdo nomi bo‘yicha aniqlanadi.

Postmarketing nazorati uchun maxsus elektron tizim orqali aniqlangan namunalar bo‘yicha tanlab olish bayonnomasi rasmiylashtiriladi va bayonnomaga asosan postmarketing nazorati rejasi ishlab chiqiladi.

Jismoniy va yuridik shaxslar, davlat organlari va tashkilotlari, ommaviy axborot vositalari hamda axborot-kommunikatsiya texnologiyalari orqali kelib tushgan ma’lumotlarda farmatsevtika mahsulotlarining sifati, xavfsizligi, noqonuniy aylanmasi, nojo‘ya ta’sirlari haqidagi axborot mavjud bo‘lganda, vakolatli organ rahbari bir ish kunida postmarketing nazoratini amalga oshirish bo‘yicha tegishli buyruq chiqaradi.

Ishchi guruh dori vositalari va tibbiy buyumlarning postmarketing nazoratini amalga oshirish uchun kamida bir martalik laboratoriya sinovlari uchun yetarli miqdordagi namunalarni ikki va undan kam bo‘lmagan obyektlardan xarid qiladi va ularni identifikatsiya qilish dalolatnomasi tuziladi va unga kassa yoki tovar cheklari ilova qilinadi.

Xarid qilingan namunalarni tashish va saqlash jarayonlari mahsulot yorlig‘i va tegishli normativ hujjatlarda belgilangan talablarga muvofiq amalga oshiriladi.

Ishchi organ xarid qilingan namunalarni ikki ish kuniga qadar sinov laboratoriyalariga yo‘llanma bilan taqdim etadi. Sinov laboratoriyalari namunalar bo‘yicha tegishli normativ hujjatlar talablariga muvofiq sinovlarni o‘tkazadi hamda sinovlar natijalari bo‘yicha namunalarning normativ hujjatlar talablariga muvofiqligi yoki muvofiq emasligi yuzasidan xulosa ko‘rsatilgan sinov bayonnomalarini rasmiylashtiradi.

Sinov bayonnomalari namunalar sinov laboratoriyasiga taqdim etilgan kundan boshlab besh ish kunida, sinov natijalari muddati besh kundan ortiq vaqt talab etiladigan mahsulotlar, shu jumladan sterillik talab etiladigan dori vositalari va tibbiy buyumlar uchun — o‘n besh ish kunida rasmiylashtirilishi kerak.

Murakkab yoki uzoq muddatli sinovlar, shuningdek, maxsus tekshiruvlarni o‘tkazish zarurati bo‘lgan alohida holatlarda dori vositalari va tibbiy buyumlarning normativ hujjatlar talablariga muvofiqligini tekshirish muddati uzaytirilishi mumkin, ammo uzaytirilgan muddat o‘ttiz ish kunidan oshmasligi kerak.

Sinov natijalari sinov bayonnomalarida aks ettiriladi. Namunalarning sinov natijalari haqqoniyligiga sinov laboratoriyalari mas’ul hisoblanadi.