“ Фармацевтика маҳсулотларининг постмаркетинг назоратини амалга ошириш тартиби тўғрисида”ги Низомга мувофиқ, постмаркетинг назорати учун аввало дори воситалари ёки тиббий буюмлар харид қилинади.

Постмаркетинг назорати учун харид қилинадиган намуналар:

- ваколатли орган томонидан Ўзбекистон Республикасида давлат рўйхатидан ўтган ва муомалага чиқарилган дори воситалари халқаро патентланмаган номи бўйича ёки тиббий буюмлар савдо номи бўйича хавфни таҳлил қилиш асосида — махсус электрон тизим орқали аниқланади.

- шунингдек, дори воситалари ёки тиббий буюмларнинг сифати, хавфсизлиги, ноқонуний айланмаси, ножўя таъсирлари ҳақида ваколатли органга келиб тушган маълумотлар ҳамда мурожаатлар асосида — савдо номи бўйича аниқланади.

Постмаркетинг назорати учун махсус электрон тизим орқали аниқланган намуналар бўйича танлаб олиш баённомаси расмийлаштирилади ва баённомага асосан постмаркетинг назорати режаси ишлаб чиқилади.

Жисмоний ва юридик шахслар, давлат органлари ва ташкилотлари, оммавий ахборот воситалари ҳамда ахборот-коммуникация технологиялари орқали келиб тушган маълумотларда фармацевтика маҳсулотларининг сифати, хавфсизлиги, ноқонуний айланмаси, ножўя таъсирлари ҳақидаги ахборот мавжуд бўлганда, ваколатли орган раҳбари бир иш кунида постмаркетинг назоратини амалга ошириш бўйича тегишли буйруқ чиқаради.

Ишчи гуруҳ дори воситалари ва тиббий буюмларнинг постмаркетинг назоратини амалга ошириш учун камида бир марталик лаборатория синовлари учун етарли миқдордаги намуналарни икки ва ундан кам бўлмаган объектлардан харид қилади ва уларни идентификация қилиш далолатномаси тузилади ва унга касса ёки товар чеклари илова қилинади.

Харид қилинган намуналарни ташиш ва сақлаш жараёнлари маҳсулот ёрлиғи ва тегишли норматив ҳужжатларда белгиланган талабларга мувофиқ амалга оширилади.

Ишчи орган харид қилинган намуналарни икки иш кунига қадар синов лабораторияларига йўлланма билан тақдим этади. Синов лабораториялари намуналар бўйича тегишли норматив ҳужжатлар талабларига мувофиқ синовларни ўтказади ҳамда синовлар натижалари бўйича намуналарнинг норматив ҳужжатлар талабларига мувофиқлиги ёки мувофиқ эмаслиги юзасидан хулоса кўрсатилган синов баённомаларини расмийлаштиради.

Синов баённомалари намуналар синов лабораториясига тақдим этилган кундан бошлаб беш иш кунида, синов натижалари муддати беш кундан ортиқ вақт талаб этиладиган маҳсулотлар, шу жумладан стериллик талаб этиладиган дори воситалари ва тиббий буюмлар учун — ўн беш иш кунида расмийлаштирилиши керак.

Мураккаб ёки узоқ муддатли синовлар, шунингдек, махсус текширувларни ўтказиш зарурати бўлган алоҳида ҳолатларда дори воситалари ва тиббий буюмларнинг норматив ҳужжатлар талабларига мувофиқлигини текшириш муддати узайтирилиши мумкин, аммо узайтирилган муддат ўттиз иш кунидан ошмаслиги керак.

Синов натижалари синов баённомаларида акс эттирилади. Намуналарнинг синов натижалари ҳаққонийлигига синов лабораториялари масъул ҳисобланади.