Даниянинг Novo Nordisk компанияси АҚШ озиқ-овқат ва дори-дармонлар сифати устидан санитария назорати бошқармаси (FDA) га компаундер дорихоналарга (compounding pharmacie - бу ишлаб чиқариш дорихонасининг аналоги) таркибида семаглутид бўлган (Ozempic ва Wegovy)  вазн йўқотиш ва диабетни даволаш учун қўлланиладиган машҳур дори воситаларининг нусхаларини тайёрлашни тақиқлашни сўраб мурожаат қилди.

Қўшма Штатларда амал қиладиган қоидаларга кўра, компаундер дорихоналар танқис бўлган фирма дориларига талабни қондириш учун нусхаларини ишлаб чиқишлари мумкин: таркибини бирлаштириш, аралаштириш ёки ўзгартириш орқали. Маълумки, Ozempic ва Wegovy шу йил кўп бора АҚШда танқис бўлган.

Дания фармацевтика ишлаб чиқарувчиси ўз баёнотида FDA дан семаглутидни дорихонада тайёрлаш ва кейинчалик сотиш учун тақиқланган дорилар рўйхатига киритишни сўради. Novo Nordisk маълумотларига кўра, Wegovyнинг комбинацияланган версиялари нотўғри дозаларда сотилади, номаълум қўшимчаларни ўз ичига олади, бу эса 2018 йилдан бери қайд этилган 400 тага яқин жиддий ножўя таъсирлар билан боғлиқ бўлиши мумкин.

Novo Nordisk "дорихона" семаглутидининг сотувини тўхтатишга уринишдан ташқари, оригинал ниқоб остида қалбакилаштирилган дориларни сотишга қарши курашишга ҳам мажбур. Баъзи ўрганилган намуналарда 33% гача номаълум аралашмалар мавжуд, бошқалари эса фойдаланиш тақиқланган BPC-157 пептидини ўз ичига олади, деб маълум қилган эди компания 2023 йил охирида.

2024 йилда FDA бир нечта компанияларга семаглутиднинг тасдиқланмаган ва нотўғри маркировкаланган версияларини сотгани учун огоҳлантириш хатларини юборди.