Хитой олимлари яшаш ҳудудига қараб диетани шакллантиришни тавсия қилишди. Уларнинг таъкидлашича, бу семизлик ва у билан боғлиқ касалликларнинг кўпайиши шароитида мамлакатда овқатланиш одатларини яхшилаш учун жуда муҳимдир. Бундан ташқари, маҳаллий озиқ-овқатларни рационга киритиш табиий ресурсларни сақлашга ёрдам беради.

Хитой семиришни ташхислаш ва даволашни стандартлаштириш бўйича биринчи кўрсатмаларини эълон қилди. Мамлакатда катта ёшли аҳолининг ярмидан кўпи аллақачон ортиқча вазнга эга ёки семизликдан азият чекади. Бу кўрсаткич ўсишда давом этиши кутилмоқда. Ҳукумат семизликни даволаш ва олдини олишда соғлом овқатланиш муҳимлигини таъкидлади.

Гуанчжоудаги Сун Ят-сен университети жамоаси ўз тадқиқотида "сайёравий саломатлик диетаси" тамойилларига амал қилиш, сут маҳсулотлари ва қизил гўшт истеъмолини камайтириш тарафдори эканини айтди. Тадқиқот Nature Food журналида чоп этилган.

Тақдим этилган маълумотларга кўра, шимолий Хитойда яшовчи, кўп миқдорда сут маҳсулотларини истеъмол қиладиган ва сабзавотларни кам истеъмол қиладиган одамлар ўз рационига кўпроқ мева ва дон маҳсулотларини киритишлари керак.

Тадқиқотда айтилишича, иқлими қаттиқроқ ва сув танқис бўлган жануби-ғарбий ҳудудларда одамлар дуккаклилар ва сабзавотларни афзал кўришлари ва қизил гўштни кўп истеъмол қилмасликлари керак.

Ўзининг унумдор ерлари билан машҳур бўлган шарқда аҳолига кўпроқ дон, денгиз маҳсулотлари ва сабзавотларни истеъмол қилиш тавсия этилади.