Тиббиёт ва фармацевтика ходимлари учун қонунчиликда қандай рағбатлантиришлар назарда тутилган?
Янги иш бошлаган салоҳиятли ёш шифокорлар учун 1 миллион сўмгача устамалар мавжуд
Бунда таълим муассасасини тугатиб (ёки битирувчи босқич талабаси), янги ишга кирган ёш шифокорларга 1 миллион сўмгача махсус ойлик устамалар уларнинг биринчи уч йиллик меҳнат фаолияти учун белгиланади.
Мазкур тоифадаги шифокорлар учун ҳар ойда:
биринчи йил учун — 1 миллион сўмдан;
иккинчи йил учун — 750 минг сўмдан;
учинчи йил учун — 500 минг сўмдан махсус ойлик устамалар тўлаб борилади.
Тиббиёт муассасасининг юқори малакали тиббиёт ва фармацевтика ходимларига лавозим маошининг 100 фоизигача ҳамда бошқа ходимларга 75 фоизигача ойлик устамалар тўланади
Мазкур устама тиббиёт муассасаси ходимларини рейтинг баҳолаш тизими асосида амалга оширилади.
Бунинг учун муассасада махсус комиссия тузилади. Ушбу комиссия ҳар бир ходимнинг меҳнат фаолияти билан боғлиқ иш юкламаси, бажарадиган вазифасининг мураккаблиги, иш самарадорлиги, соҳага қўшган ҳиссаси ҳамда бошқа санаш ва ҳужжат билан тасдиқлаш мумкин бўлган 5 та муҳим кўрсаткичларни баҳолаш учун асос сифатида белгилайди ҳамда баҳолашда мазкур кўрсаткичларга асосланади. Бунда, ходимларнинг меҳнатга виждонан муносабати, меҳнат фаолиятида кўрсатаётган юқори натижалари ҳамда касб этикасига риоя этиши инобатга олинади.
Махсус комиссия томонидан ҳар бир кўрсаткич 20 балгача бўлган рейтинг тизимида баҳоланади. Ушбу кўрсаткичларнинг умумий йиғиндиси энг юқори балларда баҳоланган тақдирда 100 бални ташкил этиши лозим.
Махсус комиссия ҳар чорак якуни бўйича кейинги ойнинг 5-санасидан бошлаб 5 иш куни ичида ходимларга берилган якуний баҳони тасдиқлайди.
Умумий 100 баллик рейтинг тизими асосида 75 балдан 100 балгача натижага эришган тиббиёт муассасаси ходимлари ойлик маошига қуйидаги тартибда қўшимча ойлик фоизли устамалар белгиланади:
тиббиёт ходимларига:
75 балдан 84 балгача ойлик маошининг 50 фоизгача миқдорида;
85 балдан 94 балгача ойлик маошининг 75 фоизгача миқдорида;
95 балдан 100 балгача ойлик маошининг 100 фоизгача миқдорида.
тиббиёт ходимларидан ташқари бошқа ходимлар учун:
75 балдан 84 балгача ойлик маошининг 25 фоизгача миқдорида;
85 балдан 94 балгача ойлик маошининг 50 фоизгача миқдорида;
95 балдан 100 балгача ойлик маошининг 75 фоизгача миқдорида.
Иккинчи сменада ишловчи шифокор ҳамда ҳамшираларга лавозим маошининг 30 фоизигача устамалар тўланади.
Оилавий шифокор пунктлари, оилавий поликлиникалар ва кўп тармоқли марказий поликлиникаларда кундузги стационар иш вақтини соат 20:00 гача узайтириш ҳисобига иккинчи сменада ишловчи шифокор ҳамда ҳамшираларга лавозим маошининг 30 фоизигача ойлик қўшимча устамалар тўлаб берилади.
Мазкур ойлик қўшимча устамалар тиббиёт ходимларининг лавозим маошига қуйидаги миқдорларда белгиланади:
тиббиёт муассасасида шифо ўрни 5 тагачани ташкил қилганда — 10 фоиз;
тиббиёт муассасасида шифо ўрни 5 тадан 10 тагачани ташкил қилганда — 20 фоиз;
тиббиёт муассасасида шифо ўрни 10 дан юқорини ташкил қилганда — 30 фоиз.
Мукофот пуллари ҳамда моддий ёрдамлар тўланади.
Бундан ташқари, тиббиёт ходимларига касбий ёки бошқа байрамлар муносабати билан мукофот пуллари ҳам берилади. Бироқ, ушбу мукофот миқдори бир календарь йил мобайнида ҳар бир ходимга икки лавозим маошидан ошмаган ҳолда белгиланиши лозим.
Шунингдек, ходимларга уларнинг мурожаатига кўра ёки тегишли тиббиёт муассасаси касаба уюшмаси ташкилотининг ташаббуси билан яқин қариндошларнинг вафот этиши, оғир жароҳатлар олиш, касал бўлиш, табиий офатлар юз берганда моддий ёрдам кўрсатилади.
Бунда юқоридаги моддий ёрдам миқдори ҳар бир тайинланган ҳолат учун ходимнинг бир лавозим маошидан ошмаслиги лозим.
Шунингдек, ходимларга муассасанинг жамоа шартномасида ёки бошқа ички локал ҳужжатларида ҳам имтиёз ва рағбатлантиришлар кўзда тутилиши мумкин.
