25 апрель – Бутунжаҳон безгакка қарши кураш куни
Жаҳон соғлиқни сақлаш ташкилотининг 2007 йил май ойида бўлиб ўтган 60-сессияси қарорига кўра, дунё бўйича ҳар йили 25 апрель – Бутунжаҳон безгакка қарши кураш куни сифатида нишонланади.
Безгак касаллиги билан ҳар йили ер юзида 200-300 миллион нафардан кўпроқ инсон касалланади.
Бунга экологик табиий офатлар, аҳолининг касалликка мойиллигини юқорилиги, ижтимоий-маиший шароит ҳамда аҳолининг миграциясини кучайиши сабаб бўлади.
Мазкур сана безгак касаллигини юқтириш хавфи, безгак бўйича нохуш ҳудудларга чиқишда шахсий ҳимоя чоралари ҳақида хабардор қилиш, безгакни даволаш мумкинлиги ва аҳолига профилактика чораларини кўриш зарурлигини тушунтириш мақсадида эълон қилинган.
Касаллик “Anopheles” чивинининг урғочиси чақиши натижасида, ҳамда зарарланган донор қонини қуйганда, тўла зарарсизлантирилмаган тиббий асбоблар, безгак билан оғриган ҳомиладор онадан туғиш жараёнида йўлдош орқали юқади.
Касалликнинг яширин даври 7 кундан 3 йил ва ундан узоқроққа чўзилиши мумкин. Касаллик одатда қалтирашдан бошланади. Лоҳаслик, дармонсизлик, жунжикиш, бош ва бел оғриғи, кўнгил айниш, иштаҳа ёмонлашиши ҳолатлари кузатилади. Биринчи хуруж қилиш тана ҳароратининг 38-39 даража ва ундан ҳам ошиши билан бошланади.
Агар шундай касаллик белгилари намоён бўлса, албатта тиббий ёрдамга мурожаат қилиш керак. Тўғри ташхис қўйиш учун қонни безгакка текшириб кўриш шарт. Қонда безгак паразитлари аниқланган ҳолда даволаш муолажаларини тезда бошлаш керак. Безгакни даволаш учун самарали дори-дармон воситалари мавжуд.
- 25 Апрель, 11:17
-
Батафсил
