Коронавирус пандемияси даврида дунё бўйича болалар ўртасида турли юқумли касалликларга қарши эмлаш кўрсаткичлари пасайиб кетиши мутахассисларда жиддий хавотир уйғотаётганди.

Вақт ўтиши билан вазият бирмунча ўнгланди. Кейинги пайтларда ўғил-қизлар ўртасида иммунизация тадбирлари жонлангандай бўлди.

Хусусан, ўтган йили жаҳон бўйича 2021 йилга нисбатан 4 миллион кўпроқ бола эмланди. Ўз навбатида, биринчи ва кейинги дозаларда вакцина олмаганлар сони шу қисқа давр ичида 24,4 миллиондан 20,5 миллион нафарга камайди.

Шунга қарамай, вазиятни қувонарли, деб бўлмайди. Яъни эмланмаган қатлам пандемиядан олдинги — 2019 йилги даражадан ҳамон юқори: бир йил аввал 18,4 миллион нафар бола эмлашни ўтказиб юборган.

Ўтган йили 20,5 миллион ўғил-қиз дифтерия, қоқшол ва кўк йўталга қарши биринчи ва тўлиқ босқичда вакцина олмаган. Жумладан, улардан 14,3 миллион нафари умуман эмланмаган.

Пандемия даврида вакциналар билан қамров кўрсаткичи сезиларли пасайиб кетган 73 та давлатдан 15 таси 2019 йилги даражага қайтишга муваффақ бўлди, 24 таси тикланиш босқичида. Аммо 34 та мамлакатда эмлаш қамрови ошмагани ёки пасайишда давом этаётгани ачинарлидир.

Қолаверса, сайёрамиз бўйича айни пайтда 35,2 миллион бола қизамиқ билан касалланиш хавфи остида қолмоқда. Ўтган йили 21,9 миллион нафар ўғил-қиз бу касалликка қарши эмланмаган. Улардан 13,3 миллион нафари вакцинанинг иккинчи дозасини қабул қилмаган.

Шундан келиб чиқиб, ЖССТ аъзо мамлакатлар соғлиқни сақлаш тузилмаларига бу масалага жиддий эътибор қаратиш юзасидан тавсияларини берди.