Корнел университети олимлари омега-3 ёг кислоталарини ўпка касалликларининг олдини олиш учун фойдали эканлигини аниқлашди. Иш натижалари American Journal of Respiratory and Critical Care Medicine журналида чоп этилган.

Тадқиқот икки босқичда ўтказилди. Биринчисида 15 000 дан ортиқ одам иштирок этди ва вақт ўтиши билан қондаги омега-3 кўп тўйинмаган ёғли кислоталар даражаси билан ўпка функцияси ўртасидаги муносабатлари ўрганиб чиқилди. Ўртача ёши 56 бўлган субъектлар эксперимент бошида соғлом эди ва кўпчилигида сурункали ўпка касаллиги белгилари йўқ еди. Кузатувлар ўртача 7 йилдан 20 йилгача давом этди.

Мутахассисларнинг хулосасига кўра, инсон қонида Омега-3 даражаси қанча баланд бўлса, ўпка ўз функциясини шунча секин пасайгани намоён бўлди. Aйниқса бу айнан ёғли балиқлар (лосось, оркинос ва сардаля) таркибида бўлган докозагексаен кислота - юқори консентрацияларда топилган омега-3 ёғ кислотаси билан кўпроқ боғлиқ деб топилди.

Иккинчи босқичда 500 000 га яқин иштирокчиларнинг маълумотлари таҳлил қилинди. Хусусан, озиқ-овқат омега-3 даражасининг кўрсаткичи сифатида қондаги генетик биомаркерларга эътибор қаратилди. Ушбу тажриба маълумотлари биринчи босқичдаги ҳулосаларни исботлади.

Балиқ ва балиқ ёғидан ташқари, омега-3 нинг бошқа манбаларига ёнғоқ ва уруғлар, ўсимлик мойлари ва махсус бойитилган овқатлар киради.