Aвстралиянинг Радиациядан ҳимоя қилиш ва Ядро хавфсизлиги бошқармаси мобил телефонлардан фойдаланиш мия саратонига олиб келмаслигини исботлади. Бу ҳақда Реутерс хабар бермоқда.

Тегишли тадқиқот Жаҳон соғлиқни сақлаш ташкилоти топшириғи асосида ўтказилган. Мутахассислар 1994 йилдан 2022 йилгача дунёнинг ўнта давлатидан тўпланган, мобил телефондан фойдаланиш ва мия саратони хавфи ўртасида боғлиқлик бор-йўқлиги ҳақидаги маълумотларни таҳлил қилишди.

Агентликнинг қайд этишича, мобил алоқа пайдо бўлган пайтда кўплаб мутахассислар уяли телефонларни бошга яқин жойда тез-тез ишлатиш мия саратонига олиб келиши мумкинлигидан қўрқишган. Шу сабабли, мобил телефон ишлаб чиқарувчилари ҳар бир телефон моделининг аниқ радио эмиссия даражасини ўлчаб, эълон қилишди.

Бироқ австралиялик олимлар томонидан ўтказилган тадқиқотда мобил телефондан фойдаланиш ва мия саратони ўртасида ҳеч қандай боғлиқлик аниқланмади.

Тадқиқотчиларнинг таъкидлашича, мия саратони билан касалланишнинг умумий даражаси тадқиқот ва маълумотлар йиғиш давомида барқарор бўлиб, вақт ўтиши билан ҳеч қандай тебранишларни кўрсатмади, чунки истеъмолчилар мобил телефонлардан тобора кўпроқ фойдаланмоқда.

Шундай қилиб, 1993 йилдан 2022 йилгача қайд этилган мия шиши ҳолатларининг кўпайиши диагностика усулларининг ривожланиши, шунингдек, МРТ- тадқиқотларининг кенг тарқалиши билан боғлиқ. Шунингдек, 2003 йилдан бери суҳбат пайтида мобил телефон энг яқин бўлган темпорал лоблар соҳасида касалликлар сонининг кўпайиши кузатилмаган.