16:12 (15.08.2024)
265
Mpox (маймун чечаги) вируси сўнгги ойларда яна глобал хавф омилига айланди. Африка, Европа, Жанубий ва Шимолий Америка минтақаларида касалланиш кўрсаткичлари сезиларли даражада ошди.
Айниқса, Конго Демократик Республикасида эпидемиологик вазият кескинлашди. Бу ерда йил бошидан буён 13,7 мингдан ортиқ киши вируснинг янги штаммини юқтириб, улардан 450 нафари вафот этди. Кейин хавфли инфекция Марказий Африка Республикаси, Бурунди, Кения, Руанда ва бошқа мамлакатлар бўйлаб тарқала бошлади.
ЖССТ раҳбари Тедрос Гебрейесус жорий йил биринчи ярмида касалланишлар сони ўтган йилга нисбатан ошиб кетганини маълум қилиб, ташкилотнинг фавқулодда вазиятлар бўйича қўмитаси йиғилишини чақиришга қарор қилди.
Хозирда ЖССТ томонидан вирус билан курашиш учун 1.5 млн доллар ажратилган ва яқин кунларда яна маблағ йўналтириш кўзда тутилган. ЖССТнинг жавоб бериш режаси дастлабки 15 миллион долларни талаб қилади ва агентлик ҳомийларга мурожаат қилишни режалаштирмоқда.
Халқаро экспертлардан таркиб топган ушбу тузилма мажлиси куни кеча бўлиб ўтди. Унинг якунида mpox эпидемияси Африка минтақасида глобал фавқулодда ҳолат деб эълон қилинди.
Мутахассислар хулосасига кўра, ҳозир кузатилаётган янги штамм вируснинг аввалги вариантларига нисбатан бир мунча хавфли. Хусусан, уни юқтирган беморларда ўлим даражаси 10 фоизгача етмоқда.
Жаҳон соғлиқни сақлаш ташкилоти эпидемияни фавқулодда ҳолат деб эълон қилиш орқали нафақат Африка, балки бошқа минтақаларда ҳам касалликни жиловлаш ва асоратларини камайтириш, жумладан, эмлаш чора-тадбирларини кучайтиришни мақсад қилган.