Hindiston hukumati yangi qarorni eʼlon qildi, unga koʼra mahalliy farmatsevtika korxonalari ishlab chiqarishning yangi standartlarga oʼtishlari kerak. Sohani tartibga soluvchi tashabbuslarga bir necha mamlakatlarda hind yoʼtal siroplarini qabul qilgan bolalarning oʼlimi sabab boʼldi, deya xabar bermoqda Reuters.

"Ishlab chiqaruvchilar farmatsevtika mahsulotlarini foydalanish uchun yaroqli ekanligi, litsenziyalash talablariga javob berishi va xavfsizligini, shuningdek sifati yoki samaradorligi yetarli boʼlmaganda bemorlarning hayotini xavf ostiga qoʼymasligini taʼminlash uchun dori vositalarining sifati boʼyicha javobgarlikni oʼz zimmasiga olishi kerak", - deyiladi xabarnomada.

Bundan tashqari, kompaniyalar endi tayyor mahsulotni bozorga ingredientlar sinovidan "qoniqarli natijalar" olgandan soʼng chiqarishlari mumkin, shu bilan birga oraliq va tayyor mahsulotlarning yetarli miqdordagi namunalarini qayta sinovdan oʼtkazish yoki partiyani tekshirish uchun saqlab qolishlari kerak.

Hindiston Sogʼliqni saqlash vazirligi avgust oyida 2022-yil dekabrdan beri 162 ta dori ishlab chiqaruvchi zavodda tekshiruvlar oʼtkazilganligi va “kelayotgan xomashyo sinovdan oʼtkazilmagani” aniqlanganini maʼlum qilgan. Hindistondagi 8500 ta kichik korxonalarning chorak qismidan kamrogʼi Jahon sogʼliqni saqlash tashkiloti (VOZ) tomonidan belgilangan dori ishlab chiqarish xalqaro standartlariga javob beradi.

Yirik ishlab chiqaruvchilar bu muammolarni olti oy ichida, kichiklar esa 12 oy ichida bartaraf etishlari kerak. Kichik kompaniyalar yangi standartlarga javob berish uchun katta investitsiya kerakligini aytib, muddatni uzaytirishni soʼrashgan, chunki ularning koʼpchiligida qarzdorlik mavjud, deyiladi xabarda.