Европа Иттифоқи 15 мамлакатга 40 миллион дозадан ортиқ парранда гриппига қарши вакцина етказиб бериш бўйича шартнома имзолади
Европа Иттифоқи 15 аъзо давлатга 40 миллион дозадан ортиқ парранда гриппига қарши ваксина етказиб бериш бўйича шартнома имзолади. Бу ҳақда Европа Иттифоқи вакиллари Reuters. агентлигига маълум қилди.
Биринчи бўлиб вакциналарни эпидемиологик вазият энг қийин бўлган Финляндия томонидан қабул қилиб олинади ва биринчи навбатда вирусга энг мойил бўлганлар, жумладан, паррандачилик фермаси ходимлари ва ветеринария шифокорлари эмланади. Шартнома CSL Seqirus компаниясидан 665 минг дозагача дастлабки харидни кўзда тутади. Қолган 40 миллион доза инфекция тарқалишига қараб тўрт йил давомида олинади.
AҚШ, Канада ва Буюк Британия ҳам парранда гриппига қарши вакциналарни етказиб беришни ташкил этиш устида ишламоқда. Маълумки, H5N1 вируси Қўшма Штатларнинг аксарият штатларида, биринчи навбатда, қушлар орасида тарқалган. Ҳозирча вируснинг одамдан одамга юқиши ҳақида хабарлар олинмаган.
Вакциналар соғлиқни сақлаш соҳасида фавқулодда вазиятларга тайёргарлик кўриш ва жавоб бериш Европа бошқармаси орқали сотиб олинади. Илгари агентлик CSL Seqirusга зоонотик (яъни ҳайвонлардан юқадиган) гриппга қарши мавжуд вакцинани вируснинг янги штаммига мослаштириш бўйича сўров юборган эди. Компания улардан ишлаб чиқиш ва ишлаб чиқариш харажатларини қоплаш учун препаратни сотиш кафолатларини талаб қилди.
H5N1 доимий равишда мутацияга учрайди ва юқтирганлар орасида ўлим даражаси юқори. Жаҳон соғлиқни сақлаш ташкилоти маълумотларига кўра, 1996-йилда вирус топилганидан буён касалланган 900 кишининг ярмидан кўпи вафот этган. Қушларнинг миграцияси вирус тарқалишининг усулларидан биридир. H5N1 эпидемияси Европа, Aфрика, Aмерика ва Яқин Шарқда қайд этилган.
