Irlandiya olimlari koronavirus pandemiyasi davrida tugʼilgan bolalarning ichak mikrobiomasi pandemiyadan oldin tugʼilgan chaqaloqlarning mikrobiomasidan farq qilishini aniqladi. "Pandemiya bolalari" tanasida koʼproq foydali va kamroq zararli bakteriyalar mavjud. Bundan tashqari, ular allergiyaga kamroq moyil.

Ichak mikrobiomasi inson metabolizmi va immunitetini tartibga solishda muhim rol oʼynaydi. Bolalikning erta davrida ichak mikrobiomasining shakllanishiga atrof-muhit, ijtimoiy aloqalar va epidemiologik omillar taʼsir koʼrsatadi.

Yangi tugʼilgan chaqaloqlar mikrobiomani onasidan, keyinroq, hayotning birinchi 6 oyida, atrof-muhit va ular bilan aloqada boʼlgan boshqa yaqin odamlardan oladi. Kork universiteti kolleji (Irlandiya) olimlari pandemiyadan oldin va pandemiya davrida tugʼilgan bolalarning ichak mikrobiomalaridagi farqlarni oʼrganishdi. Tadqiqot Allergy jurnalida chop etildi.

Olimlar 6 oylik boʼlgan 351 chaqaloqning axlat namunalarini tahlil qilishdi va bir yildan soʼng buni 343 bolada takrorlashdi. Tadqiqotchilar, shuningdek, bolalarni atopik dermatit va oziq-ovqat allergiyalari uchun sinovdan oʼtkazdilar.

Tadqiqot shuni koʼrsatdiki, pandemiya davrida tugʼilgan chaqaloqlarda bifidobakteriyalar koʼproq va toksin ishlab chiqaradigan Clostridia toksinlari karantindan oldin tugʼilgan chaqaloqlarga qaraganda kamroq. Bu karantin sharoitlari bilan bogʼliq, chunki bolalar begonalar bilan kamroq aloqada boʼlgan va kamroq kasal boʼlgan va shunga mos ravishda antibiotiklar kamroq buyurilgan. Karantin emizish davomiyligiga ham taʼsir qilgan boʼlishi mumkin. Natijada pandemiya davrida tugʼilgan chaqaloqlarda allergiya kamroq boʼlgan.

Olimlar ularning mikrobiomasidagi oʼzgarishlarning uzoq muddatli taʼsiri bor-yoʼqligini tekshirish uchun tadqiqotni bolalar 5 yoshga toʼlganda takrorlashni rejalashtirmoqda.