Vazirlar Mahkamasining 21.09.2022 yildagi “Bojxona bojlaridan ozod qilinadigan texnologik va laboratoriya uskunalari, ularning butlovchi va ehtiyot qismlari, shuningdek, xomashyo va materiallar, tibbiy buyumlar va qadoqlash materiallari roʼyxatini tasdiqlash toʼgʼrisida”gi 519-son qarori qabul qilindi.

Prezidentning “2022-2026 yillarda respublikaning farmatsevtika tarmogʼini jadal rivojlantirishga oid qoʼshimcha chora-tadbirlar toʼgʼrisida” 2022 yil 21 yanvardagi PF-55-son Farmonida Oʼzbekistonda ishlab chiqarilmaydigan uskunalar va materiallarni 2025 yil 1 yanvarga qadar bojxona bojlaridan ozod qilish nazarda tutilgan.

Hujjat bilan bojxona bojidan ozod qilinadigan, quyidagilarni oʼz ichiga olgan materiallar va uskunalar roʼyxati tasdiqlandi:

farmatsevtika mahsulotlari ishlab chiqaruvchilar, farmatsevtika mahsulotlarining ulgurji savdosi bilan shugʼullanuvchi korxonalar, ixtisoslashgan ilmiy-tadqiqot institutlari va oliy taʼlim muassasalari tomonidan olib kelinadigan laboratoriya hayvonlarini boqish, klinik-oldi tadqiqotlar va dori vositalari ishlab chiqarish uchun ishlatiladigan xomashyo va materiallar, tibbiy buyumlar va qadoqlash materiallari roʼyxati;
texnologik va laboratoriya uskunalari, ularning butlovchi va ehtiyot qismlari roʼyxati;
farmatsevtika ishlab chiqarish binolari uchun “toza xonalar”, sendvich-panellar va ventilyatsiya tizimlari roʼyxati.

Bojxona kodeksiga muvofiq tovarlar shartli chiqarib yuborilgan paytdan eʼtiboran 3 yil ichida boshqa maqsadlarda foydalanilgan taqdirda, berilgan bojxona imtiyozlari bekor qilinadi.