JSST turli mamlakatlarda 300 nafar bolaning oʼlimiga sabab boʼlgan hind yoʼtal siroplari sotuvdan olib tashlanganligi haqida ishonchli maʼlumotlarga ega emas. Yaroqlilik muddati ikki yil boʼlgan dorilarni har qanday mamlakat bozorida topish mumkin, shuningdek, ular zaharli moddalarni oʼz ichiga olgan xom ashyodan ishlab chiqarilgan boʼlishi mumkin. Shu bois, ular tomonidan halokatli zaharlanish xavfi butun dunyoda saqlanib qolmoqda, deb xabar bermoqda tashkilot vakili Reuters agentligiga.

Hozirda siroplar toʼqqizta davlatga sotilgani maʼlum, ularning oltitasi bilan dori mavjudligini kuzatish uchun bogʼlangan. JSST bu mamlakatlar nomini aytishdan bosh tortdi, chunki tergov yakunlanmagan. Reuters xabariga koʼra, hindiston yoʼtal siroplari Gambiya, Oʼzbekiston, Mikroneziya, Liberiya, Kamerun, Sharqiy Timor, Kambodja, Senegal, Filippin va Marshall orollariga yetkazib berilgan.

JSST tomonidan qoʼllab-quvvatlangan nazariyaga koʼra, 2021 yilda propilenglikol (tibbiy siroplarni tayyorlash uchun ishlatiladigan ingredient) narxi keskin oshgani sababli, bir yoki bir nechta bunday xom ashyo yetkazib beruvchilar uni etilenglikol va dietilenglikol bilan aralashtirib, ishlab chiqaruvchilarga sotgan. Aybdorlarni topishga noaniq taʼminot zanjirlari toʼsqinlik qilmoqda.

Etilenglikol va dietilenglikol koʼpincha avtomobillar tormoz suyuqligida va inson isteʼmoli uchun moʼljallanmagan boshqa mahsulotlar uchun qoʼllaniladi, ammo vijdonsiz yetkazib beruvchilar baʼzan foyda olish uchun ularni propilenglikol bilan aralashtiradilar, deb tushuntirish berdi Reuters.

Mahsulotlari Gambiya va Oʼzbekistonda oʼlim bilan bogʼliq boʼlgan ikkita kompaniya - Maiden Pharmaceuticals va Marion Biotech Hindiston hukumati tomonidan yopildi. Indoneziyaning uchta sirop ishlab chiqaruvchisi - Yarindo Farmatama, Universal Pharmaceutical Industries, AFI Farma - litsenziyalari bekor qilindi. Yana bir kompaniya - Konimex oʼzining siroplarini sotuvdan olib tashladi.

Bundan tashqari, 2023-yilning 1-iyunidan boshlab Hindistonda yoʼtal siroplari eksport qilishdan oldin majburiy sifat nazorati joriy etildi.