Бугун “Фармацевтика маҳсулотлари хавфсизлиги маркази” ДМда, соҳада фаолият юритаётган тадбиркорлар билан учрашув бўлиб ўтди.  Унда "Дори-Дармон" акциядорлик компанияси мутахассислари ҳам иштирок этишди. 

Учрашувда  2025 йилнинг 1 январидан кучга кирадиган фармацевтика маҳсулотларининг постмаркетинг назорати ва уни қандай тартибда амалга оширилиши юзасидан батафсил тушунтириш берилди.

Фармацевтика маҳсулотларининг постмаркетинг назорати - муомаладаги фармацевтика маҳсулотларининг фармацевтика фаолиятини техник жиҳатдан тартибга солиш соҳасидаги норматив ҳужжатларга мувофиқлигини баҳолашга доир чора-тадбирлар мажмуи ҳисобланади.

Шунингдек, тадбирда марказ масъуллари Вазирлар Маҳкамасининг 2024 йил 4 октябрдаги "Ўзбекистон Республикасида алоҳида тоифадаги кучли таъсир қилувчи моддалар муомаласини тартибга солиш тўғрисидаги низомни тасдиқлаш ҳақида" 632-сонли қарори мазмун моҳияти ҳақида тўхталиб, алоҳида тоифадаги кучли таъсир қилувчи моддаларни тиббиёт амалиётида қўллаш, сақлаш, уларнинг ноқонуний муомаласини чеклаш, жисмоний шахслар томонидан улардан фойдаланиш ҳамда уларни йўқ қилиш тартиблари ҳақида маълумот берди.

Мулоқот давомида тадбиркорлар фармацевтика маҳсулотлари устидан постмаркетинг назорати ва кучли таъсир қилувчи моддаларнинг хавфсиз муомаласини таъминлаш бўйича янги тартиб-қоидалар юзасидан ўзларини қизиқтирган саволларга жавоб олишди.

Таъкидлаш жоизки, мазкур учрашув соҳа вакиллари томонидан янги қоидаларни ўз вақтида ва тўғри жорий этиш орқали фармацевтика маҳсулотларининг сифатини ошириш ҳамда халқ саломатлигини таъминлашга қаратилган саъй-ҳаракатларни янада мустаҳкамлашга хизмат қилади.