Rossiyada bir guruh senatorlari va Davlat Dumasi deputatlari mahalliy kasalxonalarga qishloqlardagi dorixonalar va feldsher-akusherlik punktlari (FAP) bilan bir xil asosda dori vositalarini sotishga ruxsat berishni taklif qiluvchi qonun loyihasini koʼrib chiqish uchun taqdim etdilar. Ushbu qaror, qonun chiqaruvchilarning fikricha, qishloq aholisini kerakli dori vositalar bilan taʼminlashga yordam beradi.

Takidlanishicha, faqat dorixonalar mavjud boʼlmagan qishloqlardagi mahalliy shifoxonalar dori vositalarining chakana savdosini amalga oshirishi mumkin. Boshqa tibbiy tashkilotlar uchun mavjud cheklovlar saqlanib qoladi.

Hujjat loyihasida aytilishicha, agar tibbiyot xodimi farmatsevt yoki provizor mutaxassisligi boʼyicha oʼqitilgan boʼlsa, mahalliy shifoxonalarda dori vositalarini sotishi mumkin boʼladi. Tushuntirish xatida qayd etilganidek, aholi soni kamayganiga qaramay, aholi punktlarida mahalliy tibbiyot muassasalari oʼz faoliyatini davom ettirmoqda.

Tashabbus mualliflarining qayd etishicha, qishloq aholisini, ayniqsa, ijtimoiy himoyaga muhtoj guruhlarini (nogironlar, faxriylar va pensionerlar) dori vositalari bilan taʼminlashdagi qiyinchiliklar mahalliy shifoxonalarga dori vositalarini sotish uchun ruxsatnoma berish zarurligini tasdiqlaydi.

Qayd etilishicha, tuman kasalxonalari ambulatoriya va tez tibbiy yordam punktlariga qaraganda kattaroq va koʼproq imkoniyatlarga ega, shuning uchun u yerda farmatsevtika tartib-qoidalariga rioya qilgan holda dori-darmonlarni saqlash punktlarini tashkil etish, tibbiyot xodimlarini taqsimlash va oʼqitish, shuningdek, dori vositalarining markirovkalash jarayoniga rioya etilishini taʼminlash osonroq.