U ijtimoiy tarmoqlarda Dr.Roxy taxallusi ostida TikTokda operatsiyalarni jonli translyatsiya qilgani uchun mashhur boʻldi. Ammo plastik jarroh doktor Grav oxir-oqibat tibbiy litsenziyasidan mahrum boʻldi.

Shu yilning yozida Ogayo shtati Tibbiyot kengashi Ketrin Roksan Gravni tibbiy standartlarga javob bermagani uchun ikki marta tanbeh berib, litsenziyasini butunlay bekor qildi. Komissiya, shuningdek, tibbiy muolajalarni jonli efirga uzatish orqali Grav oʻz bemorlarini hayotini xavf ostiga qoʻyganini aniqladi.

TikTokda 825 ming obunachiga ega boʻlgan jarroh nafaqat oʻz muolajalarini jonli efirga uzatdi, balki operatsiyalar davomida kamera orqali tomoshabinlar bilan suhbatlashdi va ularning savollariga javob berdi.

Bunday holatlardan birida Grav liposaksiya, brazilcha beldan pastki qismini koʻtarish va terini taranglashtirish amaliyotini bajarayotgani jonli efirga uzatildi. Ushbu "efir" dan bir hafta oʻtmay, uning hamshirasi bu bemorni tez yordam boʻlimiga yuborishga majbur boʻldi, chunki bemorda qorin boʻshligʻida havo yigʻilganligi va jigar ensefalopatiyasi aniqlangan. Keyinchalik jarrohlar unda ichak teshilishi va jiddiy bakterial infeksiya borligini aniqladilar. Natijada, ayol oʻlik toʻqimalarni olib tashlash, qorin boʻshligʻi operatsiyasi va terini payvandlash operatsiyalarini oʻtkazish uchun bir nechta protseduralarni oʻtkazishga majbur boʻldi.

Uzoq davom etgan tekshiruvlardan soʻng tibbiy komissiya bemorlarning hayotini oʻzgartirgan "beparvolik" tufayli Grav litsenziyasini bekor qilishni tavsiya qildi.

Gravening soʻzlariga koʻra, u oʻqituvchilikdan zavqlangani va “tibbiyotdan tashqaridagi odamlarga kosmetik jarrohlik haqida tushuncha berishni” hohlagani uchun oʻz videolarini ijtimoiy tarmoqlarda tarqatgan.

Aksariyat shifokorlar ijtimoiy tarmoqlardan Gravga oʻxshab nomaqbul tarzda foydalanmasalar-da, X (sobiq Twitter) dan Facebook, Instagram va TikTokgacha boʻlgan platformalardagi muhokamalarda qatnashish shifokorlar uchun xavfli ishdir. Medscape ning yangi hisoboti shuni koʻrsatadiki, shifokorlar doimo oʻz hamkasblari tomonidan ijtimoiy tarmoqlardan noprofessional va etika qoidalariga rioya qilmasdan foydalanayotganiga guvoh boʻlishadi.